E premte, 14 mars 2025.

Kryetari i Këshillit të pakicës kombëtare shqiptare të Qytetit të Zagrebit, Emirat Asipi, dhe anëtari i Këshillit, Mafis Zendeli, zhvilluan një takim zyrtar me prorektorin për shkencë të Universitetit të Tetovës, prof. dr. Vullnet Ameti.

Gjatë takimit u diskutua për vendosjen e bashkëpunimit dhe realizimin e projekteve të përbashkëta ndërmjet komunitetit shqiptar në Zagreb dhe institucioneve akademike në Tetovë. Gjithashtu, u arrit një marrëveshje për organizimin e pritjes zyrtare të të rinjve nga Kroacia, të cilët në maj të këtij viti do të vizitojnë Tetovën në kuadër të programit të shkëmbimit kulturor dhe arsimor.

Ky takim përfaqëson një hap të rëndësishëm në forcimin e lidhjeve akademike dhe kulturore, duke ofruar mundësi të reja për të rinjtë në aspektin e bashkëpunimit arsimor dhe profesional.