E premte, 13.12.2024.

Në sallën e mbushur plot me njerëz të hotelit Antunoviq, Këshilli i Pakicës Kombëtare Shqiptare të qytetit të Zagrebit në bashkëpunim me Unionin e Shqiptarëve të Kroacisë mbajtën një mbrëmje të paharrueshme muzikore, e cila mblodhi një numër të madh vizitorësh të etur për argëtim dhe muzikë të mirë. Të ftuarit vallëzuan dhe u argëtuan deri në orët e para të mëngjesit, duke shijuar performancat e këngëtarëve të njohur shqiptarë Alban Mehmeti dhe Kaltrina Selimi, të cilët me performancat e tyre kënaqën të gjithë të pranishmit.

Ky spektakël ishte një tregues i vërtetë i trashëgimisë së pasur kulturore të komunitetit shqiptar në Zagreb dhe Këshilli i Pakicës Kombëtare Shqiptare dëshmoi edhe një herë angazhimin e tij për ruajtjen dhe promovimin e kulturës shqiptare. Projekte të tilla kanë rëndësi të madhe për forcimin e dialogut dhe mirëkuptimit ndërkulturor, si dhe për lidhjen e të gjitha komuniteteve në qytetin tonë.

Këshilli i Pakicës Kombëtare Shqiptare të Qytetit të Zagrebit do të vazhdojë traditën e organizimit të ngjarjeve të tilla edhe vitin e ardhshëm, duke shënuar fundvitin me muzikë dhe kulturë shqiptare, në frymën e bashkimit dhe miqësisë.